Vaqonların növləri

  • Bakı-Ağstafa-Bakı və Bakı-Qəbələ-Bakı marşrutları üzrə “Stadler” şirkətinin KISS markalı oturacaq tipli ikimərtəbəli elektrik qatarlarının tərkibində üç ədəd standart yerli və bir ədəd biznes yerli vaqon mövcuddur.

 

Abşeron dairəvi dəmir yolu xətti üzrə “Stadler” şirkətinin KISS markalı oturacaq tipli ikimərtəbəli elektrik qatarlarının ekonom və biznes vaqon tipi mövcuddur. Vaqonların hər birisi kondisioner, WI-FI və biotualetlə təchiz olunub.

Hərəkəti planlaşdırılan Bakı-Tbilisi-Qars-Ankara marşrutu üzrə sürət qatarının tərkibində “Stadler” şirkətinin istehsalı olan aşağıdakı vaqonlar mövcud olacaq:

  • İkiyerli kupedən ibarət birinci klass “Lyuks” vaqonunun hər bir kupesində duş kabinəsi və biotualet, dəhlizin sonunda biotualet, vaqonda minimətbəx mövcuddur. Kupenin qapısı və kupedə yerləşən əşyalar üçün yerləşdirilmiş yeşik kodlanır və hər bir sərnişinə kart şəklində açar verilir. Vaqonda kondisioner, WI-FI və multimedia sistemi də mövcuddur.
  • Ailə üçün nəzərdə tutulmuş ikiyerli kupedən ibarət birinci klass və ikiyerli kupedən ibarət ikinci klass “Lyuks” vaqonunda ikiyerli birinci klass kupesi ilə ikiyerli ikinci klass vaqonu arasındakı divar açılmaq xüsusiyyətinə malikdir. Birinci klassın kupesində duş və biotualet vardır. Ailə səfər etdiyi halda həmin divar açılır və ümumilikdə kupe dördyerli kupeyə çevrilir. Vaqonun dəhlizinin sonunda biotualet və duş kabinəsi mövcuddur. Həmçinin vaqonda minimətbəx, kondisioner, WI-FI və multimedia sistemi var. Kupenin qapısı və kupedə yerləşən əşyalar üçün yerləşdirilmiş yeşik kodlanır və hər bir sərnişinə kart şəklində açar verilir.
  • Əlillər üçün nəzərdə tutulmuş kupedən ibarət vaqonda dörd yerdən ibarət kupelər mövcuddur və bunlardan bir ədədi əlil üçün nəzərdə tutulub. Dəhlizin hər iki başında duş kabinəsi və biotualet yerləşir. Bunlardan biri əlil üçün nəzərdə tutulub. Vaqonun hər iki başında yerləşən çıxış qapıları əlil arabası üçün qaldırıcı qurğu ilə təchiz olunub. Kupenin qapısı və kupedə yerləşən əşyalar üçün yeşik kodlanır və hər bir sərnişinə kart şəklində açar verilir. Kupedə həmçinin kondisioner, WI-FI və multimedia sistemi var.
  • Dördyerli kupedən ibarət ikinci klass vaqonların dəhlizinin bir başında biotualet və duş kabinəsi, kondisioner, minimətbəx, multimedia sistemi mövcuddur. Kupenin qapısı və kupedə yerləşən əşyalar üçün yeşik kodlanır və hər bir sərnişinə kart şəklində açar verilir.

Beynəlxalq istiqamətdə Bakı-Moskva, Bakı-Kiyev, Bakı-Rostov və Bakı-Tbilisi və ölkədaxili istiqamətdə Bakı-Böyük Kəsik, Bakı-Balakən, Bakı-Horadiz, Bakı-Astara, Bakı-Köçərli sərnişin qatarlarının tərkibində 54 yerli plaskart, dördyerli kupe və ikiyerli SV vaqon tipləri mövcuddur.

Bakı-Yalama-Bakı, Bakı-Şirvan-Hacıqabul istiqamətində hərəkət edən oturacaq tipli birmərtəbəli ER-2 elektrik qatarları dörd ədəd standart yerli vaqondan ibarətdir. Qatarda ümumilikdə 240 oturacaq yer mövcuddur.